搜尋

【港人自救】社企變身採購專家 投入全球搶購口罩潮:遲一秒大批口罩在眼前白白溜走

更新日期:6月 17



武漢肺炎蔓延全球,世界各地人人自危,大肆搜購醫療口罩。在供不應求之下,社會上「一罩難求」。為幫助基層市民、長者及醫護解決燃眉之急,社企「加油香港」投身搜購口罩的工作。新年假期尚未完結,全公司上下 12 人便開始與時間競賽,馬不停蹄地聯絡各地,但在交易量數以十萬計、交易額動輒過百萬的國際口罩市場中,他們畢竟是門外漢,碰過釘,還差點吃大虧。


即日飛往印尼 感動廠商出售洗手液


猶記得 2 月初,不少港人冒著寒風通宵排隊,只望求得一盒口罩。「加油香港」的創辦人 Wayne 為能儘快搜購口罩回港緩解情況,在 2 月 6 日決定即日親身飛往印尼泗水,接觸廠商、觀察工廠環境及檢測口罩質量,但無奈廠商的口罩全數被新加坡、中國商人預購,短期內亦無法提供額外貨源。

無法訂購口罩,Wayne 轉戰消毒用品市場,嘗試游說當地廠商出售消毒產品。Wayne 指當時廠商表明,由於國家內部有一定需求,他們拒絕出口貨品到其他地區,態度甚為堅決。Wayne 在游說過程中憶起香港人的慘況,向廠商講解此行目的,說著說著便紅了雙眼,「諗起啲公公婆婆的慘況,就一路講一路喊」,最終成功感動態度強硬的廠商,購入一批消毒液回港。


由 0 開始學習:「無人係採購專家」


全球貨源供應緊張,抗疫用品訂購過程分秒必爭,遲一秒,大批口罩便有機會在眼前白白溜走;檢查有一絲紕漏,又有機會被矇騙購入不合規格的口罩,造成極大損失。為確保資金用得其所、購入口罩符合規格,沒有採購經驗的傳訊部經理 Serena 只能打醒十二分精神,不斷學習新技能。

「落訂前要供應商拍片 send 相俾我哋,睇廠嘅生產過程、口罩嘅質量。工廠嘅證書、口罩嘅 lab report 我哋都要查得好清楚,睇下口罩係咪合規格,證書係咪真。」

「佢話係三層,最簡單就剪開睇下,中間嗰層就燒下,出面嗰層攞水壺噴下,睇下佢防唔防水。」

「運輸期間,一定要叫佢(物流公司)影相,最緊要係拍片影啲貨去到邊。因為佢停嘅時間越長,被人偷龍轉鳳、攞走幾箱口罩嘅風險就越大。」

歷經大半個月的口罩爭奪戰,Serena 已經可以將訂購程序及注意事項倒背如流,處理訂單的手法亦越發老練。Serena 笑言:「香港所有人都唔係採購專家,但民間力量可愛嘅地方係,大家見到有問題就嘗試 equip 新嘅能力,變成專家,去解決問題」。


理智蓋過欣喜 成功洞悉騙局


「加油香港基金」行政總監 William 指,在訂購過程中,他們亦曾遇上不少詐騙集團,險墮騙局,其中令他印象最深刻的是一張牽涉過 1,000 萬個口罩的訂單。2 月中旬,有國際大品牌的廠商主動聯絡上他們,表明理解香港的情況,最多可出口近 1,000 萬個口罩到香港救急。求口罩心切的 William 形容,凌晨收到消息時感到興奮,亦希望能夠盡快確認訂單。

「但係興奮過後,第二朝所有同事就要做返曬所有程序。即刻睇佢個 email address,佢個 domain 幾時 create,睇下佢本身係咪做緊呢個業務。」幸然,在反覆核對的過程中,他們成功發現詐騙集團的電郵地址與廠商的電郵有些許出入,才能避免大額損失。再次提起當時的情況,William仍然覺得心有餘悸。


心力交瘁 「但覺得要做就要去做」


長期面對口罩供應遠不及需求,William 和員工成功購入一批口罩後,又要開始張羅下一批,週而復始。一個月下來,大家都憔悴了,三人在訪問間亦不禁嘲笑對方眼袋變大、越來越像熊貓云云。

「無時無刻都睇住手機,有時都會幻聽,覺得有人打入黎。」「啲貨(口罩)一日未到手,都係膽顫心驚。」

William 坦言,採購口罩是一份吃力不討好的工作,「每日都有人問啲貨到未,但係廠商遲左出貨、啲貨排唔到期上船上飛機,呢啲解釋唔到太多,係中間嘅壓力好大,啱啱就收到有 church 問啲貨到未」,他看看手機屏幕,無奈地聳肩。

收到口罩只是第一步,及後亦要按不同組織的需要分配發售,而高規格口罩將會優先售予醫護人員,「level1 就俾市民,level2 或以上就俾醫護先,呢個原則係不容退讓」。William 又指,為確保大家以最相宜的價格買到口罩,他們會盡力與廠商洽談,「平得一毫得一毫」,「有時運輸成本高左,我哋都盡量用 deal 左嘅成本價賣,都計較唔到咁多」。

「我每日都有問自己點解要做,因為都真係吃力不討好,但係加油香港就係咁,覺得要做就要去做,social mission 大於 business 考量,見到邊度有需要就幫大家諗 solution。」

#香港加油 #互給互足 #立場新聞

21 次瀏覽

地址:香港新界荃灣德士古道210號和富大廈601室

電話:2234 5922

​電郵:info@agentofchange.hk

Agent of Change Company Limited (Social Enterprise) &

Agent of Change Foundation Limited© .

All Right Reserved.